MEYERTON. – Die 22-jarige Meyertonner, Donjuan van Heerden gaan eersdaags in Frankryk die geleentheid kry om net soos sy broer Chris, ‘n IBO-titel te verower.
Chris is ‘n voormalige IBO wêreld weltergewigkampioen. Donjuan sal op 24 November teen die Fransman, Ismael Seck om die vakante IBO Kontinentale wêreld middelgewig titel meeding. Volgens Van Heerden was hy veronderstel om twee maande gelede vir die titel te boks, maar probleme met sy paspoort het hom verhoed. “Ek is ongelooflik baie opgewonde en kan nie wag nie.
Dit is die eerste keer dat ek oorsee gaan deelneem. Die geveg gaan in Toulouse plaasvind,” vertel hy opgewonde. Van Heerden en sy afrigter, John Tshabalala het hard in die gimnasium in Kibler Park gewerk en is slaggereed om hierdie uitdaging met albei hande aan te gryp.
Die 34-jarige Seck is gesoute bokser wat onoorwonne is in sy laaste ses gevegte. Dit gaan waarskynlik die jong Meyertonner se moeilikste geveg wees, maar hy sal sy wenrekord van 5 opeenvolgende seges wil uitbrei.
