VANDERBIJLPARK – Old Vaaltonians Krieketklub is besig met ‘n bouproses om vrouekrieket sy regmatige plek in die Vaaldriehoek te laat inneem.

Volgens Gert Maloney, die dryfkrag agter krieket by Old Vaal, het die identifiseringsproses twee jaar gelede reeds begin om die volgende generasie krieketsterre vanuit die Vaaldriehoek te vind en te koester.

“Die gemiddelde ouderdom van die span is 20. Ons wil hulle graag ontwikkel en geleenthede gee om in die groter ligas deel te neem. Tans speel hulle in die Gauteng Premier B liga. Ons verwag groot dinge van die span,” vertel Maloney.

Die span het onlangs teen die University of Johannesburg (UJ) gespeel. UJ het eerste gekolf en 174/9 in 35 beurte aangeteken. Vir Old Vaal het Kaelin Steenekamp vier paaltjies platgetrek. Weerlig het veroorsaak dat die kragmeting verkort is en UJ het die wedstryd uiteindelik met 64 lopies gewen.