VANDERBIJLPARK – Min atlete kan by Rose Jijane kers vashou wanneer dit by bestendigheid kom, dit het sy die afgelope paar jaar beklemtoon.

Of sy nou aan marathons of halfmarathons deelneem, die langafstandatleet van die Vaaldriehoek lewer keer op keer sterk vertonings op streeks- en nasionale vlak.

Jijane van Actom Atletiekklub het vroeër vandeesmaand nog ’n uitstekende prestasie by die ASA Nasionale 21,1 km Kampioenskap in Gqeberha gelewer, waar sy ’n indrukwekkende vyfde plek in die vroue bo 40 kategorie behaal het  in ’n uitstekende tyd van 1:22:50.

Hierdie jongste prestasie dra by tot ’n reeds indrukwekkende hardloop-CV. In 2023 het Rose die vroue-afdeling van die Rand Water Vaal River City Marathon in ’n tyd van 3:15:19 gewen.

Sy het dit in 2024 opgevolg met ’n sterk tweede plek by die Cape Gate Marathon, terwyl sy ook haar kategorie gewen het.

In 2025 het sy een van haar beste vertonings nóg gelewer deur die vroue-afdeling van die Sasol Marathon in tyd van 3:13:46 te wen, haar persoonlike beste marathontyd tot dusver.

Wat Rose se reis nog meer inspirerend maak, is haar suksesvolle oorgang van topvlak-sokker na langafstande.

As ’n voormalige Banyana Banyana-speler het sy haarself gevestig as een van die mees gerespekteerde langafstandatlete in die Vaal.

Haar volgehoue sukses is ’n bewys van haar dissipline, toewyding en onwrikbare strewe na uitnemendheid.