Spanne kraai koning op tuisveld

Ten spyte van Woensdagaand se koue weer, het die Lydenburg-ringbalspanne hul bes gedoen om hul teenstanders, Barberton, harde bene te laat kou.

Lydenburg se spanne was nie van plan om die spit teen die besoekers op eie bodem te delf nie.

Die vroue A-span het hul wedstryd teen Barberton met 42-20 gewen. Die mans A-span van Lydenburg het met 24-16 geseëvier.Saterdag het die vroue A- en B-spanne teen Komatipoort in Mbombela gespeel.

Ook hier was daar geen keer aan Lydenburg nie. Die A-span het ‘n sege van 50-12 oor Komatipoort se A-span behaal terwyl die vroue B-span met 26-16 hul wedstryd beklink het.

Hierdie naweek speel Lydenburg se vrouespanne teen Malalane in Mbombela.