MBOMBELA – Na die dood van sy baas, die vermoorde mnr. Peet van Es, moet die boelterriërreun, Moshje, ‘n nuwe tuiste kry.
Sy ander baas, wyle Van Es se lewensmaat, me. Arlene Prins is besig om Nederland toe te verhuis en Moshje kan nie saamgaan nie.
Die twee jaar oue gekastreerde boelie is Woensdagmiddag op die plaas, Mosely in die Barberton-distrik, waar Prins gewoon het, deur die DBV Nelspruit se inspekteur gaan haal en word tans by die organisasie se hondehokke in Mbombela gehuisves. Daar word ‘n goeie huis vir hom gesoek.
Die gesin se veghondkruising sal deur vriende ingeneem word, terwyl die twee Maltesers ook eersdaags by die DBV gehuisves sal word, totdat Prins se aansoek om hulle na Nederland te neem, goedge-keur word.
Die gesin moes verlede week erge trauma verwerk nadat Van Es op 8 April tydens ‘n plaasaanval vermoor is. Prins is self ook vasgebind en aangerand. Sy het later aangedui dat sy so gou as moontlik Nederland toe wou terugkeer.
Volgens DBV-inspekteur, me. Marcelle Hoffmann, is dié vereniging sensitief vir die behoeftes van alle betrokkenes en bied hulle in sulke gevalle soms hulp aan.
Hoffmann het op versoek van ‘n vriendin van Prins gereageer en die hond gaan haal.
Prins het haar by haar bakkie kom groet, en toe die huis in verdwyn. “Haar dogter het vir ons die hond gaan haal. Prins was sterk toe sy hom moes groet. Ek kry haar so jammer. Sy het soveel verloor en is nou ook die dierbare outjie kwyt.
“Ek dink ook niemand kan hulle voorstel waardeur hierdie dier gaan nie. Al was hy en die ander honde nie direk in die aanval betrokke nie, voel hulle aan dat daar iets tragies met hul eienaars gebeur het. Hulle is nie onnosel nie.”
Sy het daarop gewys dat enige toekomstige eienaar wat die tweejarige, “spekvet” hond wil aanneem, in ag moet neem dat hy nie goed met ander reuns oor die weg kom nie. Hy is wel gewoond aan en lief vir katte.
• Skakel die DBV by 013-753-3582 as jy Moshje wil aanneem.
LEES MEER oor ‘n plaasaanval in Desember in Witrivier
