Jong aasvoël kies luilekker lewe bó vryheid
Elliot is 'n Kaapse aasvoël wat verkies het om terug te gaan na die rehabilitasiesentrum nadat hy die kans gehad het om vry te vlieg, veel anders as die ambisieuse Nommer 017 wat nadat hy gesond geword het Kersfees in die Nasionale Kruger Wildtuin gevier het.
HARTBEESPOORT – Elliot, ‘n Kaapse aasvoëlkuiken wat in Februarie vanjaar vanaf sy broeikrans in die Barkleypas naby die Oos-Kaapse dorpie Elliot geval het, was van meet af aan nie ‘n ambisieuse voël nie. Hy wou bloot sy litte losmaak en die nes tydelik verlaat.
Hy het hom egter misreken en het ontwater in ‘n mielieland beland. Carlien Marais het hom daar aangetref en dit aangemeld.
Kate Webster, koördineerder van die Stormberg Roofvoëlreddingsprogram naby Queenstown, het Elliot in haar spens gepamperlang.
“Hy het nog sy donsveertjies gehad,” sê Webster. “Oulik verby! Tot die huiskat het by hom gekuier. Die skaaphonde sit ook dikwels pootjie by met geveerde besoekers soos Elliot. Eintlik dink die honde hulle is aasvoëls!”
Elliot het ook ander vriende op die plaas gehad en het ‘n smakie vir hondekos gekry.
In Februarie vanjaar is Elliot as ‘n spesiale passasier deur DHL Koerierdienste na VulPro in die Hartbeespoortdam-omgewing geneem.
Die bewaringsorganisasie is bekend vir hulle aasvoëlnavorsing asook as rehabilitasie- en navorsingsentrum.
Verlede jaar het hulle onder meer 37 Kaapse aasvoëls ingeneem, waarvan agt vrygelaat is.
Vulpro rehabilitasiesentrum in Hartbeespoort.
SIEN hoe ‘n dapper jakkals aasvoëls in die Krugerwildtuin tart
“Hy is ‘n sagte, teer outjie wat mal is daaroor om vertroetel te word,” het sy aan Laevelder gesê.
In April het die groot dag vir Elliot aangebreek. Hy sou in die Nooitgedacht-natuurreservaat in die Magaliesberge vrygelaat word. “Hy was verwilderd en verward. Hy het nie sy nuwe vryheid verstaan nie,” verduidelik Wolter.
Die boodskap was duidelik. Elliot verkies sy gemaksone by die reddingsentrum. Wolter moes hom terugneem na VulPro. Hy wou nie die luilekker lewe in die hokke prysgee nie. Hy het verseg om die wye vlaktes in te vaar, heeltemal anders as ‘n vorige spoggerige inwoner van VulPro, Nommer 017.
Die veelberese Nommer 017 (ook ‘n Kaapse aasvoël) het in 2014 met beserings van Thabazimbi ingekom.
Nadat hy gesond geword het en vrygelaat is, was daar geen keer aan hom nie. Hy het in 20 maande sewe Afrikalande, waaronder Angola en Zambië besoek. Kersfees 2016 het hy in die Nasionale Krugerwildtuin (NKW) kom kuier en sedertdien elke hoek en draai daarvan gefynkam.
Maar Elliot se blik is nie op sulke horisonne nie. Tans woon hy bo-op die toe hokke waarvandaan hy die wilde aasvoëls dophou wat die aasvoëlrestaurant besoek. “Elliot is beslis hier om te bly,” sê Wolter.
LEES meer oor die eko-kryger wat vir aasvoëls veg
• Tans word ‘n paar aasvoëls met opsporingstoestelle dopgehou wat in die Hoedspruit- en Phalaborwa-omgewing sowel as op die NKW-grense vrygelaat is en die vertes ingevlieg het.
