SKUKUZA – Die impak van lokstrikke en slagysters is onlangs weer onder die aandag gebring toe ‘n luiperd naby Phabeni-hek in die Nasionale Krugerwildtuin (NKW) met ‘n moontlike lokstrik om haar nek gesien is.

Na ‘n soektog van ‘n paar dae is sy met ‘n verdoofpyl geskiet en is daar seker gemaak dis ‘n ou wondletsel. ‘n Leeu van Punda Maria is ook dieselfde week van ‘n lokstrik om sy middel deur SANParke se veeartse verlos. ‘n Wildehond is gehelp met bek-wonde deur ‘n wildehondnavorser, Grant Beverley, nadat hy ‘n strik om die kop gekry het.

LEES hoe wildehonde al hoe meer bedreig word deur onder meer stroperstrikke

Ongelukkig is nie alle diere so gelukkig nie.

Bestaanstroping deur die stel van strikke, wippe en vangfuike is ‘n groot probleem in die wildtuin. Diere soos impalas en bosvarke word vir kos gevang om aan bosslaghuise verkoop te word. Hiervoor word tradisionele lokstrikke en slagysters gebruik.

Met die uitbreiding van die aantal gemeenskappe rondom bewaringsareas, is die voorkoms van lokstrikke en slagysters ‘n toenemende bedreiging.

Alhoewel die stroping van renosters en olifante die meeste aandag kry, is die moontlikheid groot dat vele ander diere ook uitwissing in die oë staar as gevolg van sulke onwettige jag.

Mnr. Bruce Leslie, hoof van die NKW-antistroping-spesiale operasionele span, het tydens die Rhino Tears/SANParke-ereveldwagters se mediatoer, ‘n paar lokstrikke gedemonstreer.

Hy het daarop gewys dat die stel daarvan dikwels die intreemisdaad vir renosterstropers is.

“Hierdie diewe kan nie na die naaste winkels stap vir kos nie, al het hulle ook geld. Hulle leef noodgedwonge van die land af en leer van jongs af hoe om strikke te stel.”

Die lyding van hierdie diere kan egter nie in rand en sent gemeet word nie.

LEES hoe ‘n renoster en ‘n kameelperd gehelp is om van ‘n lokstrik ontslae te raak

LEES VRYDAG MEER oor hoe lokstrikke in die Nasionale Kruger Wildtuin bekamp word.