Leilani Kuter (45) maak gereed om Mbombela Woensdag geel te verf. Kuter is op ‘n tog om vir 27 dae daagliks 27 km te stap oor die hele Suid-Afrika, vir bewusmaking en om geld in te samel vir vroue wat seksueel mishandel is.
Maandag was al die 22ste dag van haar uitdaging om ‘n totaal van 729 km af te lê. Sewe-en-twintig jaar gelede is Kuter, op die ouderdom van 17, wreed verkrag en vir dood agtergelaat. Sy was die dag by die huis en het haar vriend later die aand verwag. Iemand het geklop.
Toe sy die deur oopmaak het ‘n man in sy laat twintigerjare homself voorgestel as Frankie. Hy het aan haar verduidelik dat die inwoner van die kamer langsaan sy suster was en dat die gesin hul ouma verloor het, en vir Kuter gevra om die slegte nuus oor te dra. Sy het die vreemdeling in haar kamer ingenooi.
LEES OOK: Man accused of illegal weapon possession released on bail
“In ‘n paar sekondes was hy bo-op my. Ek het met hom probeer redeneer, maar hy wou nie luister nie. Hy haal sy gordel af en draai dit om my nek terwyl hy my so wreed verkrag dat ek my bewussyn verloor het.
Ek kan vaagweg die sakmes in my boonste laai onthou en oorweeg of ek dit moet probeer gebruik of nie. Toe hy klaar was, het hy my naak en bloedig gelaat, met ‘n riem om my nek gedraai. My lewe het vir altyd verander.
“Toe die polisie uiteindelik opdaag, het hulle verduidelik dat dit die sesde verkragtingsaak is wat binne ‘n week in die omgewing aangemeld is. Die polisie was baie sorgeloos oor die verkragting. Hulle het met my gepraat asof hulle my gevra het hoe ek hou van my eiers.”
Haar aanvaller is nooit aangekeer nie. Kuter het hulp van terapeute gekry om hierdie verskriklike gebeurtenis te hanteer. Vandag is sy ‘n voorstander van die bekamping teen geweld teen vroue, en wil ‘n sterk boodskap gee aan vroue wat dieselfde beproewing deurgemaak het. Haar boodskap aan ander oorlewendes is om hulp te kry.
“As so iets traumaties met jou gebeur het, moet jy hulp soek. Praat met iemand. Moenie stilbly nie.” Wat sou sy vandag vir die persoon sê? “Ek sou hom gevra het hoe hy grootgeword het. Iets moes vir hom verkeerd gegaan het terwyl hy grootgeword het.”
Sy moedig ma’s ook aan om hul kinders te glo en hulle grense te leer as dit by hul liggame kom. Sy het ook gesê dat sport ‘n groot rol gespeel het in haar herstelproses.
Dit het haar gehelp om in die buitewêreld te kom, en gehelp dat sy haar nie in ‘n kamer toe sluit nie, wat tot depressie kon lei.
Nou stap sy om ander vroue wat dieselfde oorleef het te bemoedig. Kuter gaan môre haar 27 km vir die dag in Mbombela stap. Haar tog begin by Hoërskool Bergvlam om 07:30.
Haar aanvaller het geel aangehad, daarom dra sy ook geel. Sy moedig almal aan om geel aan te trek en by haar aan te sluit of haar te ondersteun langs die pad.
Sy het ‘n BackaBuddy-veldtog om jong vroue soos Uyinene Mrwetyana en Megan Cremer te vereer, wat hul lewens verloor het weens geweld teen vroue.
Die stap van 27 km eindig om 12:30 by i’langa Mall. Sien die kaart van haar volledige roete op lowvelder.co.za. Vir meer inligting, kontak Corlize Luttig by 082-686-5703.
LEES OOK: Social media regulation in South Africa: new and upcoming law you must know about
