WITRIVIER – Daar is nog uitslae van die nadoodse ondersoek op me. Annatjie Myburgh (58), uitstaande.
Maroela Media het vroeër vandag berig dat sy wel aan ‘n hartaanval dood is en dat Myburgh se familie “die uitslae van die nadoodse ondersoek bevestig het”.
Laevelder het reeds Sondag berig dat sy aan vermoedelik ‘n hartaanval dood is.
Lees ook: Opvolg: Annatjie Myburgh se lyk gekry
Volgens Maroela Media het die Myburghs se familiewoordvoerder mnr. Bruce Macaulay, gesê dat die uitslag van die ondersoek op ‘n hartaanval dui.
Hy ontken dit. “Ek is verkeerd aangehaal. Ek het aan die joernalis gesê dat ons in Laevelder verneem het dat sy aan vermoedelik ‘n hartaanval dood is. Sover ons weet is hierdie uitslae nog nie beskikbaar nie.”
Lees ook: Exclusive: Missing Annatjie Myburgh’s husband talks about ordeal
Laevelder het dit by ‘n onafhanklike bron bevestig. “Sy het ‘n hartstilstand ondervind, wat nie noodwendig dieselfde as ‘n hartaanval is nie. Die uitslae oor wat dié stilstand veroorsaak het, is nog nie beskikbaar nie.”
Myburgh se roudiens is Saterdag om 11:00 vanuit die NG-gemeente op Witrivier.
