Twee verdagtes verskyn in hof vir alkoholdiefstal
Hulle het glo R800 000 se alkohol gesteel.
MBOMBELA – ‘n Man wat ‘n magdom alkohol by ‘n kettingwinkel se verspreidingsentrum wou steel, is Saterdag op heterdaad betrap.
CSG High-Tech Lowveld se Callum MacPherson het aan Laevelder gesê dat een van die sekuriteitsmaatskappy se spanne op hom afgekom het terwyl hy besig was om SPAR Lowveld se verspreidingsentrum te verlaat.
Die vragmotor wat hy bestuur het was met stapels drank gelaai – ‘n volle R800 000 daarvan. MacPherson het bevestig dat die man gearresteer is.
“Dit was die gevolg van ‘n operasie wat steeds voortgaan,” het hy gesê. Juis daarom wou MacPherson geen verdere besonderhede aan die koerant verskaf nie.
Die stad se polisiewoordvoerder, kapt. Dawie Pretorius, het gesê dat twee van die verspreidingsentrum se werkers in verband met die voorval in hegtenis geneem is.
Hulle sou gister in die Nelspruit Landdroshof verskyn op klagtes van diefstal. Die uitslag van hul hofverskyning was nie teen druktyd beskikbaar nie.
