Plaaslike kunstenaars word benoem vir kykNET Fiëstas
Dit is weer tyd vir die kykNET Fiësta-toekennings, en alhoewel die uitvoerende kunste laasjaar onder geweldige druk was, het die Laeveld nog steeds een benoeming ontvang.
John Anthony Boerma en Jan Bhuda het as kurators van die Innibos Nasionale Handwerkkunskompetisie ‘n benoeming gekry in die 11de kykNET Fiëstas. “Ons is ontroer om die benoeming te kry, wat ons passie om die land se talle ongelooflike ambagkunstenaars ondersteun,” vertel Boerma.
“Ons het die toekennings bekendgestel om Suid-Afrikaanse handwerkkunstenaars ‘n geleentheid te gee om hulle handewerk te toonkas en terselfde tyd hul uitnemenheid in bekwaamheid, nuwigheid en kreatiwiteit te vier. Ons huishoudelike ambagkunstenaars verdien om gelofsang te word en ons hoop dat hierdie benoeming op een of ander klein manier ‘n lig op die briljantheid sal skyn wat hierdie deel van die visuele kunste karakteriseer.”
Hierdie is Boerma en Bhuda se eerste kykNET Fiësta-benoeming. Hulle is tans besig om die fondse vir die 2021 Innibos Nasionale Handwerkkunskompetisie vas te maak. Die kykNET Fiëstas vereer sedert 2011 jaarliks uitsonderlike prestasies in die uitvoerende kunste wat die voorafgaande jaar by kunstefeeste te sien was.
“Die doel van die Fiëstas is om aan die feeste, die kunstenaars en die feesgangers hoop te gee,” sê Karen Meiring, MNet-direkteur: kykNET-kanale. “Dit is belangrik om die bedryf erkenning te gee, vir die manjifieke werk wat op innoverende maniere steeds op verhoë en aanlyn aangebied is.
Daar is vanjaar geskaaf aan sommige kategorieë, en nuwes is bygevoeg om met die veranderende landskap van die uitvoerende kunste tred te hou.” Ter viering van die verskeie aanlynprojekte het die Fiësta-paneel besluit om ‘n nuwe kategorie, naamlik die beste aanlynfeesprojek, te skep. Dié kategorie vereer alle projekte wat feeste aangepak het om die kunste te laat voortleef tydens grendeltyd.
“Vir die paneel gaan dit nie daaroor dat die Fiëstas noodwendig móét plaasvind nie, maar dat die kunstenaars wat erkenning verdien, bekroon móét word,” meen Herman van der Westhuizen, sameroeper van die Fiësta-paneel. “In ‘n jaar waar kunstenaars, en ook hulle agter die skerms, onder moeilike omstandighede moes skep, was die paneel veral beïndruk deur die kreatiwiteit en nuwe idees wat na vore gekom het.
LEES OOK: Nuwe boek neem 26 Laevelders se geestelike lewensverhale saam
Ons salueer die feesbesture en almal betrokke.” Die kykNET Fiësta-toekennings-geleentheid sal vanjaar weens die tans geldende Covid-19-regulasies slegs ‘n televisie-uitsending wees. Dit vind nie, soos gewoonlik, voor ‘n teatergehoor plaas nie.
LEES OOK: NHS spog met 100% slaagsyfer
Die 11de kykNET Fiëstas sal op 7 Maart om 20:00 op kykNET (DStv-kanaal 144) uitgesaai word. Talle van die Fiësta-benoemdes en kunstenaars, soos Corlea Botha, Lynelle Kenned, Devonecia Swartz en Elandré, sal deel vorm van die televisie-uitsending onder regie van Hennie van Greunen en Pedro Kruger.
Kykers kan uitsien na ‘n aand van vermaak en styl ter viering van die kunste.
