Willem Botha se grimeerklas bemagtig Laeveld-vroue
Die alombekende Suid-Afrikaanse sanger - en deesdae gesogte fotograaf - Willem Botha, het op 27 Mei by The Blue Gate ’n eksklusiewe MUD Masterclass in grimering aangebied.
Botha het die aand afgeskop met ’n paar van sy bekende treffers, waarna ’n grimeringles, gevul met wenke en raad op dié vakgebied, gevolg het.
Die geleentheid vorm deel van ’n reeks klasse wat Botha in samewerking met MUD Suid-Afrika regoor die land sal aanbied.
“Dit was sy sesde klas. Ons beplan om tussen 21 en 25 klasse vanjaar aan te bied,” het Tanya Ackermann, lid van Botha se bestuurspan, gesê.
“Die klasse bemagtig vroue deur praktiese wenke aan te bied wat hul daagliks kan gebruik.”
Volgens Christiaan Nolte, mede-eienaar van The Blue Gate, het Botha 90 gaste vir langer as drie uur vermaak.
“Ons het ongelooflike terugvoer ontvang,” het Nolte gesê. Hy meen dat geleenthede soos dié positief bydra tot die gasvryheids- en die vermaaklikeidsbedryf, wat met Covid-19 ’n reusehou weg het.
“Geleenthede soos dié dra baie mense se salarisse asook hul oorlewing,” het hy aan Laevelder gesê.
“Die rimpeleffek van so ’n geleentheid is veel groter as die aand self; dit stel sakeondernemings in staat om weer op die been te kom.”
