Kaapsewyne word voorgelê

Lyngrove Wyne se Jan-Nico Coetzee het al die pad van die Wes Kaap af gekom om die wynliefhebbers hier te laat proe hoe lekker hulle wyne is.

September 25, 2021

Michelle Boshoff 1 minute read

Café Crust het van die maandelikse
wynproe op 16 September ’n onthou aand gemaak met ’n heerlike panzanella voorgereg, afgerond met ’n hoofgereg van varkvleis met roosmaryn, sneeu-aartappels
en die allerfraaiste groenbonepakkie in spek toegedraai.
Jan-Nico Coetzee, Andre du Preez, Frik Bronkhorst en Anton Linström.
Gildelede en gaste is dit eens dat dit
een van die lekkerste proeë van die jaar was, goed gebalanseer met lekker kos, ’n leersame aanbieding en uithalerwyne uit Lyngrove se Collection-, Reserve- en
Platinum-reekse.
Die Lyngrove Platinum Pinotage 2018 het loshande voorgeloop as wyn van die aand, en die welkomwyn, Collection Sauvignon Blanc, is as beste waarde vir geld aangewys.
Maar ’n kortkop agter die twee was die Collection Rosé, die volronde
Reserve Shiraz Pinotage en Collection
Shiraz, wat alte lekker saam met die
varkvleis gegaan het. Lyngrove se Reserve Chardonnay het ook ’n A+ behaal.
Jan-Nico Coetzee skink ’n proesel vir Lize Maritz en ‘n gas.
Lyngrove Wyne is tussen Stellenbosch
en Somerset-Wes in die “goue
driehoek” van die Kaapse wynlande
geleë. Die landgoed presteer gereeld in
wynkompetisies en maak gereeld naam met hulle besonderse pinotage.
Hulle wyne is bekostigbaar en die drie reekse voorsien in die kategorie van “tjop-en dopwyne” onder R90. Die Reserve-reeks wat teen R130 ’n bottel verkoop en die Platinum-wyne teen R240 per bottel hoef nie terug te staan vir veel duurder presteerders nie.