Plesierengel ontbloot jongman se siel by Innibos Teaterweek
Jy kon lag én huil tydens dié vertoning by die Mbombela Stadsteater.
Tweede aan die beurt by Innibos se Teaterweek op 2 September was Plesierengel, waarin die gehoor die hoofkarakter se deurlopende soeke na liefde aanskou.
Die stuk is op Leon van Nierop se roman met dieselfde titel gebaseer, met Ruan Wessels wat sy plek op die verhoog inneem in die rol van Tristan Hansen.
Weens naaktheid in die stuk en die feit dat dit oor bedsake handel, is daar ‘n ouderdomsbeperking van 16, maar dit word glad nie eksplisiet aangebied nie.
ALSO READ: Fashion parade a Spring Day triumph in Lydenburg
Die verhaal is op ware gebeure gebaseer en volg Tristan se liefdelose en traumatiese grootwordjare.
Hy word ‘n hoogsbetaalde gigolo wat sy kliënte op die hande dra; tot op die punt waar hulle geen ander man as hy wil hê nie. Maar steeds is daar die konstante soeke na liefde, wat veral spruit uit sy verhouding met sy ma wat hom nog altyd koud behandel.
Tog, soos hy as jongmens sy pad deur die lewe vind en daarvan probeer sinmaak, leer hy om homself lief te hê.
Van Nierop het die teks tot draaiboek verwerk en die regie is deur Lihan Pretorius en Johan van der Merwe behartig. Van Nierop het Leftfoot Theatre Productions op ‘n vorige geleentheid geloof vir die wyse waarop hulle met die moeilike tema omgegaan het.
