Die Klas van 2025 het in kleur en styl by Hoërskool Nelspruit vir hul matriekafskeid op 16 Augustus opgedaag om ‘n aand van onvergeetlike herinneringe te maak.

Die leerlinge het vanaf 15:00 by die skool in luukse sportsmotors en unieke outydse voertuie opgedaag en is deur mnr. Willie van der Merwe, die skoolhoof, op die kleurvolle tapyt verwelkom. Hulle is om 18:00 met busse na Kavinga Gastehuis vervoer waar die onthaal plaasgevind het.

LEES OOK: Barberton se matrieks van 1975 hou na 50 jaar reünie

Die groep is deur die gr. 11’s, Simoné Lourens en Gideon du Plessis, ontvang. Mnr. Otto Joubert het die verrigtinge met gebed geopen. Die gaste kon nou die voorgereg geniet. Mnr. Tiaan Snyman, het met die leerders gepraat, gevolg deur Van der Merwe. Daarna is hoofgereg met ‘n verskeidenheid pastas, slaaie en brode bedien.

Die bedankings het ná ete gevolg, net voor die leerders se voete behoorlik vir die dansvloer begin jeuk het. Die kos is deur Kwanyoni Lodge voorsien en liplekker-nageregte is laaste bedien, van Peppermint Crisp-tert tot malvapoeding.

LEES OOK: Hoërskool Nelspruit se matrieks wéér Mpumalanga se beste

Die dux’e, Emma Snyman en Divan de Kock het die dansbaan geopen en die matrieks kon tot laat hulle beste danspassies uithaal.