Dozi saal sy ‘Ou Ryperd’ op en sing goue oues by Hennie’s Nelspruit
Al tree hy deesdae minder op, het Dozi gewys dat sy tydlose treffers steeds aanklank vind.
Henk Opperman, beter bekend as Dozi, het Saterdagaand vir groot vermaak by Hennie’s Nelspruit gesorg.
Sy vierpotige vriend, Okkie, wat oral saam met hom reis, het ook kom kuier en ’n paar gratis bene geniet terwyl Dozi die gehoor vermaak het.
LEES OOK: Laevelders trek kuierskoene aan saam met Pieter Smith
Dozi, wat al meer as 20 jaar in die Afrikaanse musiekbedryf is, het erken dat hy deesdae minder optree en verkies om kleiner vertonings te doen.
Hy het van sy grootste treffers, soos “Ou Ryperd”, “Grassade in die Wind” en “Staan Net ‘n Bietjie Stil”, gesing. Laevelders het nostalgies geraak en die bekende lirieke woord vir woord saamgesing. Dozi het egter nie net met sy sang beïndruk nie, maar ook die gehoor bekoor met sy indrukwekkende elektriese
kitaarspel.
LEES OOK: Jan Blohm bring nuwe lig na die Laeveld
Sy optrede het weer eens gewys waarom hy al dekades lank een van Afrikaans se gewildste kunstenaars is en hoe sy musiek sedert die 90’s by aanhangers aanklank vind. Dié ouryperd reis nog deur musiekliefhebbers se lewensbane.
