Vlammies se sterre skyn op vele gebiede

MBOMBELA – Hoërskool Bergvlam-leerders se ywer en toewyding op akademiese, kultuur-, gemeenskapsdiens- en leierskapsgebiede sowel as in sport is onlangs tydens die skool se jaarlikse meriete-aand erken.

Die matriek dux-leerder Monique Lewis spog met ‘n gemiddeld van 91,4 persent. Sy is ook vereer met die Danie Snyman-wisseltrofee vir die gr. 12-leerder met die hoogste uitmuntende prestasie in wiskunde en fisiese wetenskap.

Monique kon onderskeidelik 94 persent en 92 persent in dié vakke behaal.

Steve Engelbrecht is as die kultuurpersoonlikheid van die jaar aangewys vir, onder andere, ses goue toekennings by die nasionale eisteddfod oor die afgelope vyf jaar, sy wen by die Suid-Afrikaanse talentkompetisie in drama, sy twee streeksoorwinnings in Radikale Redenaars, en sy deelname aan elke revue wat die skool sedert 2012 aangebied het.

Die hoof se toekenning is ook aan hom oorhandig. Skoolhoof me. Annemarie Kleynhans het gesê dit is vir sy leierskap, entoesiasme, vermaaklikheid en betrokkenheid op talle gebiede.

Steve is vir drie jaar tot die skool se studenteraad verkies, voor hy vanjaar adjunkpresident geword het. Hy is verlede jaar as ‘n lid van Mbombela se junior stadsraad aangewys. Hy het vanjaar Mpumalanga op die Nelson Mandela-jeugparlement as provinsiale ambassadeur verteenwoordig.

Op akademiese vlak handhaaf hy ook deurgaans ‘n gemiddeld bo 75 persent en neem nasionaal aan wetenskapsekspo’s deel. Hy is nie net genooi om aan die plaaslike eisteddfod se gala-aand deel te neem nie, maar was ook die seremoniemeester. Boonop was hy by verskeie welwillendheidsprojekte betrokke.

Keisha Jacobs is op haar beurt as die Vlam van Bergvlam vereer. Haar omgee, veelsydigheid van deelname, akademiese prestasies, en lojaliteit is as merkwaardig bestempel.

Sy was op die Onderonsie se redaksie, is ‘n formidabele spreker in Radikale Redenaars en het ‘n groot rol in die skool se Mamma Magic-opvoering vertolk. Keisha het ook vir twee jaar op die junior stadsraad gedien, en is tot sergeant at arms in die jeugparlement verkies.

Kleynhans sê Keisha het voorwaar die skool se leuse van “Brand met trots” versinnebeeld.

Verspringer Maudas Banda is as die sportman van die jaar vereer, terwyl skyfskietkampioen Miranda de Jager as die sportvrou aangewys is.

Maudas het vanjaar weer gewys hy het uitsonderlike talent. Hy het eers ;n nuwe rekord opgestel by die skool se interhuis, en weer toe weer by die interhoër.

By die Suid-Afrikaanse Skole-kampioenskappe het hy weer ‘n goue medalje verower, voor hy by ASA se junior kampioenskappe in Bloemfontein nog een tot sy versameling gevoeg het.

Hy is toe verkies tot die span wat Suid-Afrika by die Afrika Jeugspele in Mauritius verteenwoordig het. Hy het ‘n vierde plek gekry. Daarna het hy sy land weer verteenwoordig, dié keer by die IAAF se Wêreld Jeugkampioenskappe in Colombia.

Hier het hy tot die 20ste plek op die wêreldrandlys vir sy ouderdomsgroep gestyg. Met sy deursettingsvermoë, harde werk en ystere wil verdien hy voorwaar dié eer.

 

Miranda was nie net kaptein van Mpumalanga se jukskeispan by die Mpumalanga Skole-kampioenskap in Pretoria in Desember 2014 nie, maar het ook ‘n goue medalje gewen in dubbelspel, en een in die trips-afdeling.

Sy het by die Suid-Afrikaanse Junior Jukskeikampioenskappe in Kroonstad weer die provinsiale span gelei, en is tot die kapteins van die streekspan en SA A-span verkies. Laasgenoemde het haar nog ‘n goue medalje besorg.

Sy is vanjaar weer as kaptein vir die o/19 dogterspan wat Mpumalanga by die SA Junior Jukskeikampionskappe in Kroonstad gaan verteenwoordig verkies.

Ere-mierieteskilde is ook oorhandig aan Faantjie Steyn vir die goue medalje wat hy by die nasionale junior kampioenskappe behaal het. Stephan Roodt het ook weereens sy nasionale kleure in skiet behaal.

Top sportsterre volgens kode:

Atletiek

Njabuliso Ngomane – senior dogter

Kabelo Theledi – junior seun

Thandiwe Malinga – junior dogter.

Hokkie

 

Jeandré Wessels – senior seun

Adelaide Sidell – senior dogter

Emanuel Mashele – junior seun

Caitlin Walters – junior dogter

Krieket

Aiden Soiné – senior seun

Deon Olivier – junior seun

Karli Nel – dogterspeler

Landloop

Henning van Aswegen – senior seun

Monique Lewis – senior dogter

Abraham van der Merwe – junior seun

Netbal

Simoné Fourie – seniorspeler

Andile Phiri – juniorspeler

Rugby

Tristan Louw – seniorspeler

Dylan Sjöblom – juniorspeler

Skiet

Tshepang Raditsela – senior pistoolskut

Janica Viljoen – senior geweerskut

Petri Visagie – junior geweerskut

Sokker

 

Tristan Laubscher – senior seun

Thulile Mthembu – senior dogter

Howard Sigudla – junior seun

Lebohang Molobela – junior dogter

Swem

Gyula Kasa – senior seun

Monique Lewis  – senior dogter

Rinus de Bruin – junior seun

Thelise Saunders – junior dogter

Tennis

Ndumiso Thwala – senior seun

Janette Booysen – senior dogter

Ashraf Arabi – junior seun

Letsatsi Mabaso – junior dogter.

• Lees nog: Bergvlam se atlete maak die skool trots