Sangeres van Ohrigstad se sangdroom word waar

Terwyl die besoekers deur die stalletjies by ‘n fees of kermis wandel, is daar gewoonlik ‘n plaaslike kunstenaar wie se stem in die agtergrond gehoor kan word.
Maar Kimmy Reiners se stem het die feesgangers laat stilstaan tydens ‘n onlangse optrede in Lydenburg.

Sy het verlede maand by die Rusoord vir Bejaardes se kermis opgetree, en haar eerste CD, My gebed vir jou, word nou ook te koop aangebied.

Reiners droom al van kindsbeen af om voor mense te sing, maar haar droom het nie daar geëindig nie. Sy het ook saam met haar ouers in die kerk gesing, en vir hulle ‘n paar jaar gelede gesê dat sy sang nou graag haar loopbaan wil maak.

“Ek glo daarin dat musiek mense gelukkig maak. As ‘n mens daarna streef om ander gelukkig te maak, dan sal die wêreld ‘n beter plek wees,” het Reiners gesê.
Haar droom het begin vleuels kry toe sy by die plaaslike sangeres en stemkunstenaar, Elaine Grobler van Global Artists, sanglesse begin neem het.
Sy het ook die geleentheid gekry om haar CD by die Dolf Brits Ateljee in Johannesburg op te neem.

“Een van my groot sanginspirasies is Monique Steyn en haar lied, ‘Die boom’, is my gunsteling om te vertolk. Daar is 12 liedjies op my CD en die meeste is van ander kunstenaars. Ek skryf ook my eie lirieke en hoop om dit eendag op te neem. Daar is baie meer feeste in die kontrei as waarvan mense bewus is,” het sy gesê.
Om Reiners vir enige optrede te bespreek, skakel 063 978 0361.