Gebed, hommeltuie, spoorsnyhonde – steeds geen teken van Mielie nie
Australiaanse beeshond al twee weke weg.
Nie ’n hartroerende smeekgebed, hommeltuie, spoorsnyhonde, helikopters of ’n soekgeselskap kon iets oplewer in die soektog na Mielie nie.
Kevin Ruthven van Kingdom Trails vertel dat daar weer oor die naweek gesoek is na sy boesemvriend-hond, Mielie, wat vandag vir twee weke weg is.
Die bekende storie van Bergloper en MielieBrood het duisende se harte aangegryp, en daar het oor die naweek ’n groep mense saamgekom om as ’n soekgeselskap, die Olifantsrivier se oewers te fynkam.
Kevin sê dat die Clarice K9 eenheid wat verlede naweek gaan soek het na Mielie se spoor, hierdie naweek teruggekeer het.
“Die BackaBuddy profiel wat iemand vir my gestig het staan al op R35 000 en daar is reeds ’n hommeltuig aangekoop sodat ek meer intens deur die bos kan soek.”
Kevin vertel dat hy gaan aanhou soek en nog nie gereed is om op te gee nie.
Hy publiseer op ’n daaglikse basis smeekgebede vir Mielie op sy Facebook profiel, Bergloper en MielieBrood.
Hartroerende soektog na hond – ‘sonder Mielie is Brood net Brood’
