Aiden Nel (18), ‘n NWU-eerstejaarstudent, wat in 2024 as Mnr. Tiener SA aangewys is, sal in Oktober Suid-AfriKa by Mnr. SA Tiener Heelal Internasionaal verteenwoordig.

As Meneer Tiener SA was dit Aiden se rol en plig gewees om ander jongmense te mentor en te inspireer. Die kompetisie het gedien as ’n platform vir wenners om ’n positiewe verskil in hul gemeenskappe te maak en as rolmodel vir ander tieners op te tree.

“Ek het vir die Meneer Tiener SA kompetisie ingeskryf omdat ek glo dit ’n ongelooflike geleentheid is om jong Suid-Afrikaners te verteenwoordig wat passievol is oor hul drome, hetsy in akademie, sport of enige ander veld. Dit bied ook vir my die kans om uit my gemaksone te tree, my selfvertroue te bou en te leer by ander wat ’n visie vir positiewe impak deel. Ek hoop om ander tieners te inspireer om hul potensiaal te verwesenlik en hul doelwitte en drome onverskrokke na te jaag, ongeag die struikelblokke wat hulle in die gesig mag staar,” het hy gesê.

Aiden is ’n gebore Potchefstromer en was hoofseun van Potchefstroom Central School in 2019. Hy is ’n bekende in swemkringe en het reeds op 17-jarige ouderdom Suid- Afrika tydens die 15de Afrika Junior Swemkampioenskappe in Desember 2023 in Mauritius verteenwoordig.

Aiden is egter nie net ’n talentvolle swemmer en mooi gesig nie, maar ook ’n briljante leerder. Hy studeer tans BCom Ekonomiese Wetenskappe met Risikobestuur aan die Noordwes-Universiteit.

Hy sal Suid-Afrika van 6-12 Oktober in Panama in die tiener afdeling saam met Marcel Roux, die huidige Mnr. Suid-Afrika, verteenwoordig.

Aiden het egter jou stem nodig om sy droom waar te maak.

Jy kan vir Aiden stem deur sy foto’s op Mister Universe International se Instagram bladsy te gaan like by https:// www.instagram.com/universe_ international_mr_/.

Verdere inligting oor die volgende rondte stemme vir die kompetisie sal ook binnekort op die bladsy bekend gemaak word.