Die Afrikaanse literêre wêreld in rou
Lees meer oor die begrafnisreëlings van Prof. Hans Du Plessis. 'n Skakel is beskikbaar in die artikel vir diegene wat die diens in persoon wil bywoon.
Die Afrikaanse literêre wêreld het ‘n onherstelbare verlies gely met die afsterwe van Prof. Hans du Plessis, wat op 25 Oktober op 79-jarige ouderdom in Huis Eikelaan in Potchefstroom oorlede is.
Hy sou op 15 Januarie 2025 sy 80ste verjaarsdag gevier het. Met sy dood het ‘n groot figuur in die Afrikaanse bos geval, en die leemte wat hy agterlaat, is onmeetbaar.
Prof. du Plessis was ‘n vooraanstaande akademikus, skrywer en mentor, met ‘n wye invloed op die Afrikaanse taal en kultuur. As hoof van die ATKV-Skryfskool aan die Noordwes-Universiteit het hy ‘n generasie skrywers en kunstenaars gevorm, en sy passie vir prosa en poësie het sy studente diep geïnspireer.
“Hy was ‘n mentor vir baie van ons,” het Didi Potgieter, ‘n medeskrywer, gesê.
“Sy bydrae het my lewe en skryfloopbaan gevorm.” Sy ryk nalatenskap sluit nie net rubrieke en romans in nie, maar ook poëtiese werke in Griekwa-Afrikaans. Sy Griekwapsalms het ‘n nuwe dimensie aan die Afrikaanse poësie gegee.
Sy gesin, het gesê: “Sy lewe was woorde, maar woorde kan nie beskryf wat hy vir ons beteken het nie.”
Prof. du Plessis het meer as 200 akademiese publikasies gehad en was ‘n gerespekteerde figuur in akademiese kringe.
Die ATKV-Skryfskool, wat hy gestig het, het ‘n platform vir jong talent geword. Sy lesings en werkswinkels was altyd inspirerend en vol humor. “Rustig, Hans. Jy was ‘n groot man, en ons sal jou altyd onthou,” het een van sy studente gesê, wat die gevoelens van vele ander weerspieël.
Reëlings vir die begrafnis van prof. Hans du Plessis, geliefde vader, oupa, skrywer, digter, akademikus en mentor, is deur die familie bekendgemaak. Die troosdiens vind plaas om 11:00 op Saterdag, 2 November, vanuit die NG-gemeente Grimbeeckpark, hoek van Zederberg- en Lupinestraat, Potchefstroom.
ʼn Gedenkdiens om sy lewe en nalatenskap te vier, sal vroeg in 2025 gehou word. Dié gedenkdiens sal gekombineer word met die bekendstelling van Du Plessis se laaste boek, Klein Wonderwerkie, wat kort voor sy afsterwe afgehandel is. Du Plessis se wens was dat die boek in 2025 as deel van die Afrikaans Amptelik 100-vieringe bekendgestel word. Die gedenkdiens sal dus ook sy bydrae tot en nalatenskap in Afrikaans eer. Meer inligting oor dié gedenkdiens sal later bekend gemaak word.
Om dit vir familie, vriende en ander geliefdes makliker te maak om die troosdiens Saterdag by te woon, sal ʼn regstreekse uitsending van die diens op Du Plessis se Facebook-blad gevolg kan word. Diegene wat beplan om dit in persoon by te woon, word versoek om die familie van hul voorneme in kennis te stel sodat voldoende logistieke reëlings getref kan word.
