’n Gesamentlike polisie-operasie in Potchefstroom, het Woensdag meer as 80 arrestasies opgelewer en ’n beduidende hoeveelheid gesteelde goedere en dwelms is op beslag geneem.

Die operasie het in die vroeë oggendure afgeskop en is, in twee woonstelgeboue uitgevoer. Een in Auto laan en die ander in James Moroka-straat. Die aksie is gelei deur die waarnemende distriksbevelvoerder van Dr Kenneth Kaunda.

Verskeie eenhede van die Suid-Afrikaanse Polisiediens, insluitend Misdaadintelligensie, Openbare Orde Polisiëring, die Taktiese Reaksiespan, die Honde-eenheid, Sigbare Polisiëring en Speurders is betrek.

In totaal is 85 persone in hegtenis geneem vir die oortreding van die Immigrasiewet, twee verdagtes gearresteer vir die handel in dwelms, en drie verdagtes vir besit van vermoedelik gesteelde goedere.

Tydens die operasie is verskeie items gekonfiskeer, waaronder:

• Koperkabels, meestal in 2m-lengtes gesny, met ’n geskatte straatwaarde van R74 552

• Verskeie tipes dwelms, insluitend nyaope, crystal meth, mandrax, rocks en dagga

• ’n Fiets

• Ses selfone

Die waarnemende provinsiale polisiekommissaris van Noordwes, majoor-generaal Patrick Asaneng, het beklemtoon dat hierdie optrede deel is van ’n volgehoue strategie om misdaad in die gebied uit te roei.

“Die polisie sal aanhou om die ruimte vir misdadigers te verklein en hulle uit hul sogenaamde veilige skuilplekke te verdryf. Dit is presies waarom hierdie operasie in hierdie area van Potchefstroom uitgevoer is. Dit het ’n brandpunt vir verskeie soorte misdade geword,” het Asaneng gesê.

Die polisie het die gemeenskap bedank vir hul samewerking en het inwoners verseker dat sulke operasies voortgesit sal word om Potchefstroom ’n veiliger plek vir almal te maak.