Sy gooi die gewigstootbal verder as al die seuns in haar skool.”
So vertel die bekende plaaslike atletiekafrigter en meestersatleet, Theuns Naudé oor een van sy top SA atlete, Jamoré Olivier (o.12), wat goud met ‘n 12.36 m gooi by die SA Skolekampioenskappe in Germiston behaal het.
Olivier, ‘n graad ses-leerder aan Laerskool Mooirivier, is ‘n rekordbreker van formaat en het by die Noordwes Atletiekkampioenskappe drie keer haar eie rekord gebreek. “Gewigstoot is vir my lekker en ek geniet dit baie. Ek wil net aanhou verbeter,” noem sy. Naudé se ander SA-atleet, Martiné van Aswegen (Laerskool Mooirivier) het in die gewigstoot-item met ‘n 9.39 meter gooi in die o.10-afdeling die skare staande gehad en sodoende brons op die SA’s in Germiston verwerf. Van Aswegen toon fenominale groei nadat Naudé haar slegs vanaf die begin van die jaar afrig. “Hulle albei kan mooi kophou en dit is belangrik.
“Hulle is doelgerig en vir my gaan dit net om die beste uit hulle te kry. Die medaljes is net ‘n bonus,” vertel Naudé met ‘n glimlag.
Dit is duidelik dat hierdie twee atlete nog mooi dopgehou moet word in dié velditem en dat die rekords glad nie veilig is wanneer hulle in die sirkel stap nie.
