Die o.15 span van Ferdies het in die eerste rondte van die Virsekerbeker teen Curro Roodeplaat in Pretoria te staan gekom. Die besoekers het met groot durf die wedstryd begin en Curro vanuit die staanspoor onder groot druk geplaas. Die span se uitstekende eerste fase spel het die grondslag gelê vir die eerste twee drieë. Ferdies was halftyd 10-0 voor te danke aan drieë van AC Prinsloo en Robert Theart. Theart het ook die span se derde drie gedruk om die wentelling van 15-7 op die telbord te sit.
Die span kom nou Saterdag in die kwarteindrondte van die Virsekerbeker teen Hoërskool Bekker te staan op die velde van Voortrekkerhoogte High School.
Ferdies se eerstespan gaan kragte meet met Hoërskool Balfour dié komende Saterdag, in die kwarteindrondte.