Noordwes se o.19 span het hulle Khaya Majolaweek gister, 18 Desember, op die J.B. Marks Oval met ‘n knap 4 paaltjie oorwinning teen die Oostelike Provinsie begin.
Dit was die beste resultaat waarvoor Noordwes en hulle kaptein, Volkies se Corné Prinsloo, voor kon vra. Dit sal beslis die selfvertroue ‘n ekstra hupstoot gee vir die komende wedstryde teen Gauteng en Boland in die week.
NW het OP se telling van 248/8 in 50 boulbeurte in die 47ste boulbeurt oorgesteek met die telling op 252/6. Dit was danksy ‘n skitterende 80 van mede-Volkie, Waldo Kemp, wat die grondslag vir die oorwinning gelê het.
Hierdie hotklou openingskolwer het ‘n fantastiese beurt gespeel wat 7 viere ingesluit het en het saam met sy mede openingskolwer, Bathabile Masigo (44) ‘n goeie 97 lopie vennootskap aanmekaar gesit. Kemp is beslis een van NW se groot troefkaarte en het weer sy kwaliteit en mentaliteit in lopiejaagtogte bewys.
Kemp en Prinsloo het ook vir die tweede paaltjie die druk op OP geplaas met ‘n 69 lopie vennootskap. Kemp en Prinsloo (35) het kort na mekaar hulle paaltjies verloor en ‘n klein middelkolforde ineenstorting het toe weer vir OP hoop gegee met die telling op 194/6.
Hoërskool Rustenburg se Hanro Swanepoel (31 van 18 balle) en Rico Fryer (30 van 19) het toe koppe en kolwe bymekaar gesit en met ‘n doelgerigte en aggressiewe 58 lopie vennootskap seker gemaak dat NW die teiken haal. Vroeër het NW se boulers ook goed gevaar om OP te beperk. Prinsloo (2/29) in 10 boulbeurte het vroeg ‘n been voor paaltjie beslissing in sy guns gekry om sy toernooi op ‘n goeie noot te begin. OP het van 14/1 na 86/2 gevorder danksy ‘n 56 (78) van Cormey van der Watt. OP paaltjiewagter, Casey Keevy slaan ook ‘n goeie 50 (44).
NW se naatbouler, MJ Mostert het ook met 1/24 in 7 boulbeurte uitgeblink en kon meer paaltjies geneem het as die geluk aan sy kant was. Aan OP se kant was Olwakhe Goqoza met 3/40 in 10 boulbeurte skitterend. Noordwes speel vandag teen Gauteng in hulle tweede wedstryd van die 2021 Khaya Majola Week. Hulle sal moet ligloop vir hierdie span se kolwers veral nadat Ronan Hermann teen Boland gister ‘n fantastiese 152* gemoker het in sy span se 147 lopie oorwinning.
