Hoër Volkskool Potchefstroom se o.15A krieketspan het bewys dat hulle kookwater krieket speel met ‘n 315 lopie oorwinning teen Grey Kollege se o.15’s by die HJS Krieketfees in Paarl op Saterdag, 8 Januarie.
Volkies het ‘n behoorlike pak slae vir Grey uitgedeel in ‘n oorwinning wat hierdie Potchefstromers nog lank sal onthou.
Volkies het eerste gekolf en 347/5 na 50 boulbeurte aangeteken. Louis van Wyk se 103 (125) en Theunis Nel se 86 van 56 balle bou die fondasie vir hulle kolfbeurt.
Ruan Smit dra ook ‘n goeie 58 (76) by.
Toe Grey Kollege die kolf optel toe lyk dit of die kolfblad aansienlik verander het, met die Bloemfonteiners wat vir slegs 32 almal uit in 15.2 boulbeurte uitgeboul is.
Zander Kok se 3/8 in 4 boulbeurte, Themba Sontjane se 2/9 in 4 boulbeurte en Schalk Pienaar se 24 in 3 boulbeurte lei Volkies na ‘n indrukwekkende oorwinning en bewys dat hierdie span beslis een is om dop te hou vanjaar.
