Volkies se eerste krieketspan het die afgelope naweek uitstekende spel by Wildeklawer Diamantveld T20 vertoon met twee indrukwekkende oorwinnings teen Oakdale en Helpmekaar, voordat hulle ’n noue nederlaag teen Stellenberg moes trotseer.
In hul eerste wedstryd het Volkies met 47 lopies teen Helpmekaar se eerstespan geseëvier. Louis van Wyk (65 vanaf 47 balle) en Riekert Kruger (61 vanaf 47 balle) het die fondament vir ’n stewige telling van 182/7 gelê. Eduan van der Merwe (20 van 10 balle) het vinnig bygedra in die laaste oors om die telling te stoot. In die boulbeurt het Van der Merwe (2/19), Olefa Padi (2/25) en Schalk Pienaar (1/12) gesorg dat Helpmekaar beperk is tot 135/6.
Teen Oakdale was dit egter ’n ware vertoning van oorheersing. Oakdale is vir 132 in 19.1 boulbeurte uitgeboul, met Olefa Padi (3/18), Van der Merwe (2/14) en Hermann Hesse (2/17) wat almal groot bydraes gelewer het. Volkies se openingkolwers, Van der Merwe (61*) en Van Wyk (60*), het daarna die teiken sonder enige paaltjieverlies in net 10.4 boulbeurte bereik.
Die laaste wedstryd teen Stellenberg het egter nie volgens plan verloop nie. Volkies kon slegs 82 lopies aanteken, met Van der Merwe en Van Wyk wat elk 23 bygedra het. Stellenberg het die teiken in 13.2 boulbeurte bereik en met vier paaltjies gewen, ten spyte van goeie boulwerk deur Van der Merwe (2/16) en Hesse (2/22).
Volgens Wynand Schmitt, direkteur van krieket by Volkies, is hy trots op die span se vasberadenheid en die manier waarop hulle as eenheid saamwerk. “Die seuns wys ware gees en groei elke wedstryd. Twee oorwinnings uit drie teen sterk skole is ’n bewys van hul potensiaal,” sê Schmitt.
