Volkies se vreugdesvure brand hoog nadat hul vanmiddag (Saterdag, 23 Mei) vir die eerste keer in vier jaar die Classic Clash-eerstespanrugbywedstryd met 34-26 op hul tuisveld gewen het.

Dit was ’n emosionele en opwindende stryd tussen Volkies en Gimmies, met albei skole wat hul ondersteuners deur ’n spanningsvolle 70 minute geneem het.

Volkies se losskakel, Kyle Hattingh, het twee drieë gedruk – een om die telbord in die eerste helfte te open en ’n tweede om die wen vir sy span te verseker.

Volkies se heelagter, Carlo van der Merwe, het twee doelskoppe en ’n strafskop oorgesit. Sy skopwerk in stresvolle situasies was ook baie goed. River Samuel, Lethabo Riet en Wian Victor het ook vir Volkies in die tweede helfte gaan druk, wat baie meer oop was.

Gimmies se taak is bemoeilik toe die vaskopstut, Nicolas Dreyer, reeds ná 10 minute met ’n rooi kaart vir gevaarlike spel afgestuur is nadat hy Volkies se skrumskakel omgedop het.

Die eerste helfte was ’n taai stryd, met albei spanne wat vir 30 minute geen punte kon aanteken nie.

Hattingh se breek na binne om ’n pragtige drie af te rond, is net drie minute later uitgekanselleer toe die slot, Phillip Botha, vir Gimmies oorduik om die spanne met 7-7 teen halftyd te laat.

Volkies het die inisiatief in die tweede helfte geneem toe Riet oorduik nadat hy deur ’n gaping gebars het. Die flank, Wian Victor, is in die 40ste minuut oor om Volkies ’n 20-7-voorsprong te gee.

Die tuisspan was nou in beheer, maar Gimmies het nie gaan stilsit nie en hul gevaar gewys met ’n teenaanval toe die linkervleuel, Reba Moalosi, langs die kantlyn vir Volkies in die stof los.

Kort daarna is Gimmies se kranige kaptein, De Wet Grobler, ook oor om die druk op Volkies te hou. Een aspek waarmee Gimmies in die tweede helfte gesukkel het, was hul lynstane, wat keer op keer afgeneem is. Samuel se drie ná ’n uitstekende kort aangee van Hattingh het Volkies weer met agt punte laat voorloop.

Dit was wel nie die einde van die drama nie, want Grobler het met brute krag sy span in die wedstryd gehou met ’n drie in die hoekie.

Zandré da Silva het met ’n moeilike skop verdoel en nou was Gimmies net een punt agter met die telling op 27-26.

Volkies en Hattingh het wel die laaste sê gehad toe hy onder die pale gaan druk het om die wen te verseker.

Rugbyuitslae van die dag: (Gimmies wen 6 van die nege kragmetings. Een is gelykop en Volkies wen twee kragmetings)

o14
• A – Gimmies 22-7 Volkies
• B – Gimmies 14-20 Volkies

o15
• A – Gimmies 21-10 Volkies
• B – Gimmies 36-12 Volkies

o16
• A – Gimmies 13-13 Volkies
• B – Gimmies 7-5 Volkies

o19
• C – Gimmies 17-11 Volkies
• B – Gimmies 15-12 Volkies

• Daar sal meer oor die dag se rugbyaksie deur die loop van die naweek verskyn met foto’s en videos wat binnekort beskikbaar sal wees.