Een van Potchefstroom Gimnasium se top jong netbalspelers, Chanel Duarté, is vir SA o16 netbalspan gekies na ‘n uitstekende Suid-Afrikaanse Skolenetbal (SASN) toernooi wat by Dr E.G. Jansen in Boksburg vanaf 28 Junie – 1 Julie plaasgevind het.
Chanel is eerstens in die top 35 spelersgroep gekies waarna sy daarna een van 12 uitgesoekte spelers landswyd gekies is.
Chanel is ‘n oud-leerder van Laerskool Mooirivier en speel puik netbal vir Gimmies.
Twee ander Gimmies is ook vir die top 35 gekies in die o17 ouderdomsgroep. Dit is Milana Matthys en Diané Pretorius.
“Om onder die land se beste netbalspelers erken te word, is ‘n besondere prestasie en getuig van harde werk, toewyding en deursettingsvermoë. Julle het die Gimmie-naam met trots uitgedra en bewys dat uitnemendheid die vrug van volgehoue werk is,” noem Potchefstroom Gimnasium op hul Facebookblad.
