Die NWU Eagles is weer op die wenpad nadat hul vir Kovsies vanaand (Saterdag, 31 Augustus) in nog ‘n klipharde stryd met 50-48 getroef het.

Die NWU moes wys dat hul nederlaag van 60-43 teen UJ gisteraand nie hul momentum kon keer nie. Die motivering was groot vir Elsunet du Plessis se span om sake reg te stel en ook om die eerste span vanjaar te wees wat Kovsies klop.

Die NWU het soos ‘n eenheid teen Kovsies gespeel en in die taai oomblikke het hul net meer antwoorde gehad as hul teenstanders van Bloemfontein. Die telling was 37-37 na die derde kwart, maar die NWU kon ‘n vyf punte voorsprong behaal wat Kovsies net nie kon inhaal nie.

Met hierdie wen is die NWU nou derde op die punteleer op 12 punte. Kovsies is tweede op 13 punte en UJ is heelbo op 16 punte.