MEYERTON – Die talentvolle Caitie Rock is bekend as solo sanger en as lid van die 4 Eva Young Band. In 2022 was sy Annie, in die musiekblyspel Annie wat deur die Pretoria Jeugteater aangebied is.

Sy was toe in graad ses. Vandag is sy ‘n jong dame van 16 aan die Hoërskool Dr. Malan. Haar familie en vriende het groot gegaan vir hierdie belangrike verjaarsdag.

Die naweek voor haar verjaarsdag op 3 April het haar ouers, Theresa en Fabian, haar verras met ‘n besoek aan die Elephant Sanctuary in Hartbeespoort.

Hier het sy ‘n groot droom bewaarheid deur saam met die olifante te stap. Op haar verjaarsdag, het Caitie gedink die gesin gaan net by Steam Café eet. Intussen het haar ouers vir haar ‘n verrassingspartytjie saam met haar beste vriendinne beplan.

Sy kon haar oë nie glo toe sy in die vertrek instap met die baie blou en wit ballonne, en al die vriendelike gesigte nie.

Die afgelope vakansie was ‘n besige een vir Caitie. Sy het aan die ASAatletiekkampioenskappe in Germiston deelgeneem in haar twee gunsteling baanitems. Die 100m- en 400m-hekkies waar sy haar doelwit bereik het.

Sy het o18 deelgeneem en wou net onder die eerste 12 eindig. Uiteindelik het sy ‘n10de en 11de plek gekry onder die top 24 hekkiesatlete vir hierdie ouderdomsgroep in die land.

Naas atletiek geniet Caitie dit om hokkie te speel en is sy vlak na haar verjaarsdag op ‘n hokkietoer na Bethlehem, saam met die res van die Dokkies se o16-span.

Sy werk hard aan nuwe liedjies vir opname later die jaar. Een van haar eerste optredes na die besige atletiekseisoen is by die Eureka Skool se Damestee wat op 23 Mei by die Hoërskool Dr. Malan plaasvind.