Eerste publikasie in Vaalweekblad – 20 Januarie 2021

Retha Fitchat
VANDERBIJLPARK. – Die oggendverkeer op die Vereeniging/Paryspad is Maandag, 18 Januarie, vir ‘n geruime tyd ontwrig na ‘n botsing tussen ‘n silwerkleurige Volkswagen Polo, ‘n polisievoertuig en ‘n bromponie.
Die bestuurder van die groot 400cc bromponie het op slag gesterf. Die jong man se naam was teen Vaalweekblad se saktyd nog nie amptelik bekend gemaak nie. Die ongeluk het omstreeks 05:45 by die groot kruising tussen die Vereeniging/Paryspad en Frikkie Meyer-boulevard plaasgevind. Daar was glo eers ‘n botsing tussen die polisievangwa en die Polo, waarna die motorfietsryer getref is. Die polisievoertuig het daarna ‘n betonmuur wat as ‘n advertensiebord gebruik word, langs die pad getref voordat dit sowat 40 meter verder in die veld tot stilstand gekom het.
Na wat verneem word is die polisiebeampte nie beseer nie, maar een van die twee vroulike insittendes van die Polo het matige beserings opgedoen en is op die toneel deur paramedici ondersoek en behandel. Sy is later deur familielede hospitaal toe geneem.
Die polisie en verkeersowerheid was ‘n geruime tyd op die toneel om die oorsaak en omstandighede van die ongeluk te ondersoek.