‘n Man het gesterf en vier ander het beserings opgedoen toe die luukse BMW waarin hulle gery het, Saterdagaand die pad verlaat, omgeslaan en onderstebo op ‘n palisadeheining beland het.

Die ongeluk het op die Barrage-pad naby Rand Water se kantore in Vereeniging gebeur.

Volgens Werner Vermaak, ER24 se bestuurder: Korporatiewe kommunikasie, het paramedici met hul aankoms ‘n man aangetref wat ‘n paar meter van die voertuig af gelê het. Hy is dadelik ondersoek maar ongelukkig kon paramedici niks meer vir hom doen nie. Hy is op die toneel dood verklaar.

Vier ander mense wat insittendes van die voertuig was, is deur omstanders uit die motor gehelp voordat paramedici op die toneel aangekom het. Die drie mans en ‘n vrou is op die toneel behandel en na Mediclinic Vereeniging en die Vereeniging/Kopanong-hospitaal vervoer.

Die polisie en plaaslike verkeersowerhede was op die toneel om die oorsaak van die ongeluk te ondersoek.

*************************************************************************************************************************