SASOLBURG. – Die gemeenskaps-organisasie Staan Saam Sasolburg/Vaalpark het sy babaskoene uitgeskop en ‘n nuwe baadjie as Bring Hoop Vaaldriehoek aangetrek.

Volgens Stephan Venter, een van die stigters van Staan Saam Sasolburg/Vaalpark, is dié organisasie nou amptelik deel van Boere Droogtehulp SA en sal voortaan as Bring Hoop Vaaldriehoek bekendstaan.

Staan Saaam Sasolburg/Vaalpark het fondse ingesamel, boere gehelp, mense in die dorp bygestaan, strate en straatligte reggemaak om maar net ‘n paar dinge op te noem. Bring Hoop Vaaldriehoek se Facebookblad het volgens Venter sedert verlede Vrydag met 1 354 lede gegroei.

“Ons gaan nou projekte in Vanderbijlpark, Vereeniging en omliggende areas kan aandurf om almal te laat saam staan en ‘n verskil te maak. Ek is baie opgewonde oor dit,” het Venter aan Vaalweekblad gesê.