#abrushoflove – Hoop is soos ‘n opkikker, dit verhef mense bo depressie. Die kleur van hoop is verblindend en helder.

Ek het die voorreg gehad om Maandag saam met Jeané van Dam, ‘n finalis in die Miss Grand South Africa-kompetisie en Eugene van Coffee Lift, ‘n pad van vreugde te kies.

Ons het begin deur by Jenny, wat naartjies op die hoek van Beethoven- en Deliusstraat verkoop, te gaan inloer.
Met ‘n groot glimlag het Jenny ons geleer dat geloof alles moontlik maak, nie maklik nie … maar moontlik.

Ons glo dat geloof die enigste lig is vir ons dorp en ons land.
Vrees laat die wolf groter lyk as wat hy is, maar Jeané glo om goed te doen op elke manier wat vir jou moontlik is, op elke plek waar God jou bring, aan alle mense, so lank as wat jy kan.

Eugene is ‘n lewendige voorbeeld van hoop, sy entoesiasme oor die lewe beeld uit dat daar hoop is as jy die musiek van more kan hoor.

Ten tye van die pandemie kan ons mekaar nie meer vertroos of aanraak nie, maar ‘n besem het dit weer moontlik gemaak. Jenny het van oor-tot-oor geglimlag toe Jeané haar ‘n “drukkie” gee terwyl Eugene haar met ‘n warm koffie bederf het.

Dankbaarheid skep ‘n glimlag en word ‘n gawe. Ons daag almal uit om met ‘n besem te begin rondry en op so ‘n manier steeds omgee, liefde en troos te kan deel.