SASOLBURG. – Oproermakers wat glo werksgeleenthede by ‘n winkelsentrum in Sasolburg wil hê, het verlede Donderdag die oggendverkeer ontwrig toe hulle buitebande in DF Malanstraat aan die brand gesteek het.

Bande is ook op die sypaadjie oorkant Checkers aan die brand gesteek.

Vaalweekblad verneem dat die oproeriges, hoofsaaklik jong mans, geëis het dat 50% van die werksgeleenthede wat beskikbaar is gedurende opknappingwerk aan sakegeboue in die straat, aan plaaslike inwoners gegee moet word.

Volgens raadslid Jacques Barnard, DA-koukusvoorsitter in die Metsimaholo-stadsraad, het die gemeenskapspolisiëringsforum, die polisie en plaaslike sekuriteitsdienste Donderdag vinnig gereageer nadat die onluste aangemeld is.

Nadat die brande geblus en die oproeriges onder beheer gekry is, was die pad nog ‘n tyd lank gesluit terwyl die polisie die omgewing gemonitor het. Niemand is in die voorval beseer nie en geen voertuie is beskadig nie.

Kyk na die video hier :https://www.youtube.com/watch?v=KOrZNqd7u4M

******************************************************************************************************************************