VANDERBIJLPARK. – Hier wag ‘n ware fees op Valies: ‘n Mark- en feesdag word vir 24 Junie by die Centurions Motorfietsklub se klubhuis in Shakespearestraat beplan. Dit sal die oggend om 09:00 begin en tot omstreeks 16:00 aanhou.
Die dag sal ‘n kombinasie van ‘n boeremark, vlooimark en buitelewe-uitstalling wees. Alle winste gaan gebruik word om in die behoeftes van minderbevoorregtes in die plaaslike gemeenskap te voorsien.

Hoewel die naam van die dag “Boerejol” is, wil die organiseerders graag mense van alle kulture en tale betrek om dit ‘n lekker dag vir die breë gemeenskap te maak.
Die Boerejol word aangebied in samewerking met AfriForum se Vanderbijlparktak en die Centurions Motorfietsklub. Dit is een van die min kere per jaar wat die Centurions Motorfietsklub sy deure oopmaak vir die hele gemeenskap en nie net vir motorfietsryers nie.

Op die verhoog, beman deur DJ Ben, sal daar ‘n vol program wees. Verskeie sangers gaan optree en musiek verskaf wat in almal se smaak sal val. ‘n Veilige speelplek en gratis aktiwiteite vir kinders sal heeldag beskikbaar wees. Die kinder-area sal deur Helpende Hand se maatskaplike dienste beman word.
Kosstalletjies sal ‘n wye verskeidenheid eetgoed te koop aanbied. Lekkernye soos koeksisters, melkterk, ander gebak asook koffie en tee sal beskikbaar wees. Spesialiteit-stalletjies soos mampoer, biltong en salami vorm deel van die dag. Ander stalletjies sal iets van alles te koop aanbied. Die organiseerders beoog om die hele perseel vol stalletjies te hê. Centurions se kroeg sal die hele dag oop wees vir verversings.

Interessante aktiwiteite tydens die Boerejol sluit ‘n Sterkman- en Sterkvrou-kompetisie in en daar sal ook ‘n toutrekkompetisie vir skole en volwassenes wees.
Daar is nog plek vir enkele kosstalletjies sowel as ander stalletjies. Kontak Hendrik by 084 705 5937 om ‘n stalletjie te bespreek of meer daaroor uit te vind.