VANDERBIJLPARK – Wanneer die Koning van SA-Popmusiek se musiekfabriek nie treffers produseer, maak Kaptein Kurt Darren lyne op die Vaalrivier nat.
Darren en Gert Vermeulen het tydens die Vaal River Bass Classic 2026 by die Liquid Lounge River Venue by die Tsgo Sun Emerald Resort & Casino in Vanderbijlpark die prys vir die grootste vis, ’n boot-en-enjin-pakket ter waarde van sowat R700 000 gewen.
Hul beloning was ’n Ultra X17-boot met ’n Yamaha F150-buiteboordmotor wat hulle voortaan sal aandryf. Garmin het ook tot die prys bygedra.
Daar was voorts meer as R600 000 se prysgeld op die spel met die grootste vis as een van die vernaamste afdelings. Die geleentheid het ook ’n tweedaagse span-kompetisie en die Triple Crown Challenge ingesluit.
Team Bass World SA het die tweede plek in die spankategorie behaal en ’n Lowrance Elite 9 FS as prys ontvang.
Die kompetisie het hengelaars van regoor die land na die Vaalrivier gelok vir twee dae se swartbaars-hengel.
Kaptein, span die seile! Dié keer was dit ’n groot vangs wat Darren se naam op die ”charts” laat beland het.
Die volledige uitslae was tydens publikasie nie beskikbaar nie.
