Die gewilde sanger en liedjieskrywer, Armand Steenkamp, is opgewonde om sy splinternuwe lied “Blou Diamant” bekend te stel. Die lied sal beskikbaar wees op alle digitale platforms en sal saam met ‘n musiekvideo vrygestel word wat besigtig kan word op  Vonk Musiek se YouTube-kanaal.

“Blou Diamant” is geïnspireer deur ‘n fiktiewe verhaal wat Armand se ouma uitgedink het toe sy aan demensie begin ly het. Sy het Armand en sy pa gevra wat met die “Blou Diamant” gebeur het wat “verskuil” was in ‘n duin in die Boesmanland. Armand was gefassineer deur die verhaal en het besluit om ‘n tong-in-die-kies-lied oor sy ouma se verhaal te skryf. Die lied vertel die verhaal van ‘n ondeunde jongman wat op soek is na die begeerde “Blou Diamant”. Hy deurkruis die uitgestrekte landskap van die Boesmanland en deel sy avonture en grappige oomblikke onderweg. Met sy kenmerkende styl en aansteeklike melodieë bied Armand ‘n unieke musikale ervaring aan sy ondersteuners.

Armand is ‘n gerespekteerde kunstenaar in die Suid-Afrikaanse musiekbedryf en het reeds ‘n aantal treffers op sy kerfstok. Sy musiek is bekend vir die aanraak van harte en vermaak van luisteraars van alle ouderdomme. Met “Blou Diamant” bewys hy weer eens sy veelsydigheid en kreatiwiteit as kunstenaar.

Hy is baie opgewonde oor die vrystelling van “Blou Diamant” en nooi almal uit om dit te luister en te geniet.

Kyk die video hier: https://youtu.be/CPnYk0oIlqk

Luister die lied hier: https://linktr.ee/armandsteenkamp

Sosiale Media

Armand Steenkamp Facebook – https://www.facebook.com/armandsteenkampsanger