Chanté Reynecke van die Vaaldriehoek sê sy benodig raad nadat haar ma deur selfoon-swendelaars uit haar geld gekul is.
Chanté vertel: My ma was onlangs by ‘n bekende motorhawe waar ‘n vreemdeling vir haar gesê het om sekere stappe op haar selfoon te volg vir ‘n prys of beloning. Die persoon het baie geloofwaardig en betroubaar voorgekom.
My ma se bankrekeninge was egter daarna leeggetrek en haar foon en selfoonnommer is nou onbruikbaar. Wat kan ons doen dat sy ten minste weer haar foon kan gebruik?

Hier is die stappe wat direk na so ‘n voorval gedoen moet word:
1. Kontak haar bank: Lig hulle in oor die bedrogspul en moontlike ongemagtigde transaksies. Hulle kan dalk haar rekening vries of transaksies omkeer.
2. Dien ‘n klag by die plaaslike polisie of kubermisdaadeenheid in.
3. Indien moontlik, verander wagwoorde vir alle rekeninge wat aan haar foon of banktoepassing gekoppel is.
4. Versoek die betrokke motorhawe vir video-inligting.
5. Besoek haar diensverskafferwinkel: Verskaf haar identifikasie en bewys van eienaarskap om moontlik haar nommer of telefoondiens te herstel.
Die beste raad is om sulke voorvalle te voorkom deur nooit vertroulike inligting met onbekende individue of “helpers” te deel nie.