VANDERBIJLPARK – Kunstedraai was in rep en roer op 16 Januarie toe Miss Global South Africa 2025, Chanel Rautenbach amptelik kom kuier het.

Chanel en Franciska van der Merwe van die Akademie vir Dramakuns loop al ʼn lang paadjie saam. “Sy het dramaklas by my geneem as tiener en haar selfvertroue is nou ongelooflik,” beduie Franciska.

Volgens Chanel is dit selfvertroue en die liefde vir die kunste wat jou slyp vir enige iets in die lewe.

Sy is ʼn oud-leerling van Afrikaans Hoër Sasolburg. Tans studeer sy modeontwerp. Haar liefde vir modeontwerp het sy al van kleinsaf.

“Ek het altyd my ma se materiaal gevat en dit om my gedrapeer en in die bome geklim,” lag sy vrolik. Sy het dan ook haar eie matriekafskeidsrok ontwerp in 2022.