VANDERBIJLPARK – Emfuleni Gymnastics is trots op vier van hul trampolien-springers wat gekies is om aan die Hans Christian Andersen City Games in Denmark te gaan deelneem.

Willem Pieterse, Thando Hadebe, Alexander du Plessis en Logan du Plessis is in die Gautengspan opgeneem wat vanaf 28 Julie tot 2 Augustus deel van die unieke spele sal wees.

Die spele word elke jaar gehou, maar dit is die eerste keer dat springers van Emfuleni Gymnastics Denmark toe gaan.

Die Hans Christian Andersen City Games is nie net ʼn kompetisie nie, die gimnaste en trampolien-springers neem ook aan ontwikkelingsprogramme deel en dan is daar tyd vir sosiale uitstappies na onder andere Odense Zoo en die Ten Pin Bowling baan.