SASOLBURG – Die Metsimaholo Plaaslike Munisipaliteit het verlede week nuwe uniforms aan sy verordeningstoepassers oorhandig as deel van ‘n poging om professionaliteit te bevorder en dienslewering te versterk.

Die oorhandiging het op Donderdag 2 Julie plaasgevind, waar die waarnemende bestuurder van Openbare Veiligheid, Bongi Mpembe en superintendent Carly Ramaele saam met die beamptes die geleentheid bygewoon het.

Volgens die munisipaliteit vorm die nuwe uniforms deel van sy pogings om beamptes beter toe te rus vir hul daaglikse pligte.

Dit sluit die toepassing van munisipale verordeninge (by-laws), die bekamping van onwettige storting, die beskerming van openbare infrastruktuur, die opvolg van inwoners se klagtes en samewerking met ander wetstoepassingsagentskappe in om openbare veiligheid te bevorder.

Beamptes speel ook ‘n rol in gemeenskapsbewusmaking oor verantwoordelike omgewings- en burgerlike praktyke.

Die munisipaliteit sê die nuwe uniforms weerspieël sy voortgesette belegging in openbare veiligheidspersoneel en sy verbintenis tot ‘n veilige, skoon en goed bestuurde gemeenskap.

Inwoners word aangemoedig om gevalle van onwettige storting en ander oortredings van munisipale verordeninge by die Verordeningseenheid aan te meld.