MEYERTON – Vegters van Meyerton Fighting Systems het hul staal gewys tydens die WAKO Afrika Kontinentale Kampioenskap wat van 9 – 12 Desember in Benoni, Johannesburg plaasgevind het.

Onder die bekwame leiding van Sensei David Kies het hierdie talentvolle atlete Suid-Afrika met trots verteenwoordig op die internasionale verhoog.

Meer as 571 vegters van 15 Afrika-lande het aan die toernooi deelgeneem, maar die span van Meyerton Fighting Systems het ‘n indrukwekkende medaljeoes behaal.

Hulle het 16 goue medaljes, 13 silwer medaljes en 5 brons medaljes verower, wat hul status as top vegters in Afrika bevestig.

Na afloop van die kampioenskap spog Meyerton Fighting Systems nou met 10 Afrikakampioene.

Hierdie prestasie getuig van hul harde werk, toewyding en die gehalte afrigting wat hulle van Sensei Kies ontvang.

Die kampioenskap was ‘n ware toets van vaardigheid en deursettingsvermoë, en die vegters het met hul uitstekende vertonings bewys dat hulle mededingers van wêreldgehalte is.

Deur die Suid-Afrikaanse vlag hoog te hou, het hulle nie net hulself nie, maar ook hul gemeenskap en hul sport vereer.

Hierdie oorwinning is ‘n bewys van die groei en talent binne SuidAfrikaanse gevegssport en dien as ‘n inspirasie vir ander aspirant-vegters om hul drome na te jaag.

Met sulke talent en deursettingsvermoë is die toekoms vir Meyerton Fighting Systems blink en vol belofte.