MEYERTON – Die Dokkies Netbal Aandreeks het Dinsdagaande vanaf 4 tot 25 Februarie die Hoërskool Dr. Malan laat lewe kry en weke se opwindende vermaak vir jonk en oud verskaf.
Met minstens 15 spanne insluitend Goal Getters, Diamond Divas, Hoop Hooligans, Silver Strikers en die Vereeniging Netbalklub, was die toernooi ’n ware viering van die sport.
Spelers het gewissel van hoërskoolleerders tot opvoeders en klubspelers.
Almal het meegeding in ’n vriendelike, maar vurige atmosfeer.
Elke wedstryd was vol vinnige aksie, skerp aangeë en indrukwekkende doelskietvernuf, terwyl die kantlyne en pawiljoene met entoesiastiese ondersteuners gevul was.
Die Onnies het ’n stewige stryd gevoer teen jonger spanne, terwyl die Flower Puff Girls en Sonneblomme gehore beïndruk het met hul spanwerk.
Die Bomb Squad het hul naam gestand gedoen met ontploffende spel, en Thunder het beïndruk met hul blitsige voetwerk.
Buite die baan het die reeks gemeenskapsbande versterk en sportmangees bevorder.
