VEREENIGING – Die Vaal Atletiekklub het op Saterdag 31 Mei hul jaarlikse Comrades-afskeidsfunksie by STEAM Café and Restaurant in Three Rivers gehou.

Hierdie jaar sal 13 toegewyde atlete van die klub vir die 2025 Comrades Marathon aantree.

Die wedloop – ook bekend as die Ultimate Human Race – vind op Sondag 8 Junie plaas.

Die span bestaan uit ’n mengsel van ondervinding en nuwe gesigte. Drie nuwelinge – Anja de Bruin, Monica Jordaan en Charles Malherbe – gaan vanjaar hul eerste Comrades aanpak, terwyl drie gesoute atlete reeds hul Groen Nommer verwerf het, wat toegeken word aan atlete wat die wedloop tien keer of meer voltooi het.

Die mees ervare in die span is Cor Grey met 19 Comrades-medaljes op sy kerfstok (insluitend 3 Bill Rowan-, 13 Brons- en 3 Vic Clapham-medaljes), gevolg deur Leon van Rensburg met 18 en Jacques Ferreira met 12 medaljes.

Roelof van Wyk sal vanjaar mik na sy tiende Cormades te voltooi en hopelik sy Groen Nommer te verwerf.

Die 2025 Comrades is ’n af-wedloop van sowat 89,98 km, van die stadsaal in Pietermaritzburg tot by Durban.

Dié atlete het maande lank hard geoefen en is reg vir die enorme uitdaging wat voorlê.