MEYERTON – Die Midvaal Plaaslike Munisipaliteit het meer as R1,2 miljoen belê in ’n nuwe outomatiese chloor-doseringstelsel om te verseker dat drinkwater aan inwoners veilig bly en aan nasionale standaarde voldoen.

Burgemeester Peter Teixeira het verlede week die installasie by die Meyerton-reservoir besoek en Vaalweekblad persoonlik genooi om die nuwe stelsel te besigtig. In ’n video op sy Facebook-blad het hy dit as ’n proaktiewe stap beskryf om inwoners teen watergedraagde siektes soos cholera te beskerm.

“Hierdie reservoir voorsien sowat 80% van Midvaal se drinkwater. Hierdie nuwe stelsel is nog ’n manier waarop ons die ekstra myl gaan vir ons gemeenskap,” het Teixeira gesê.

Die stelsel, wat by die grootste reservoir in die munisipaliteit geïnstalleer is, voeg chloor by die water op grond van die vloeitempo en monitor deurlopend die oorblywende chloorvlakke. Volgens die kontrakteur op die terrein is dit nodig omdat chloor mettertyd afbreek soos die water verder van die reservoir beweeg.

Die burgemeester het gesê die besluit om die stelsel aan te skaf is geneem na aanleiding van bekommernisse uit die gemeenskap en laboratoriumtoetse wat wel bevestig het dat die water veilig is, maar ook gewys het dat sekere elemente nie optimaal is nie.

Die stelsel help ook om infrastruktuur te beskerm deur korrosie in pype te verminder. Die plan is om die stelsel later ook in gebiede soos Eye of Africa, Walker’s Fruit Farms, Henley-on-Klip en Daleside uit te brei, namate fondse beskikbaar raak.