MIDVAAL – Die veelsydige sangeres en storieverteller, Yolandie, het onlangs haar kreatiewe vlerke wyd gesprei met die vrystelling van ’n remix van haar treffersang Morné se Lied en die gepaardgaande boek Die wonderwerk van “Morné se Lied”.

Beide projekte is spesiaal tydens Vrouemaand en haar verjaarsdagmaand bekendgestel, en neem die gehoor en lesers op ’n intieme, emosionele reis.

Wat oorspronklik as ’n speelse musikale oomblik begin het, het ontwikkel tot ’n pad van verwerking, hoop en insig.

Die remix, wat in samewerking met André Hartman gedoen is, bring ’n ligte, vars en gevoelvolle klank aan ’n lied wat reeds baie harte geraak het.

“Ek wou nie die lied swaar of dramaties maak nie. Hierdie remix is ’n viering van hoe musiek ons laat voel, laat onthou en laat beweeg,” sê Yolandie.

Die lied nooi luisteraars uit om saam te sing, saam te dans en dalk iets van hul eie lewe raak te hoor.

Die boek, Die wonderwerk van “Morné se Lied”, bied ’n eerlike besinning oor hoe een lied ’n hele mens kan oopmaak.

Dit is ’n storie van geloof, sinsoeking, lig en liefde, met musiek as metgesel en gids. Yolandie deel haar persoonlike pelgrimstog en die emosionele agtergrond van die lied se ontstaan, en beskryf dit as ’n verwerking, ’n wonderwerk en ’n bietjie genesing.

Binnekort kan aanhangers uitsien na eksklusiewe luister- en leesgeleenthede, ’n oudioboekweergawe van die boek, en lewendige optredes wat sang en storievertelling kombineer.

Met haar lig-klassieke stem en ’n hart vir storie, het Yolandie die afgelope jare stadig maar seker haar plek in die Afrikaanse musieklandskap herontdek.

Ná ’n lang stilte het sy in 2023 haar stem herontdek en blom in 2025 met treffers soos Engel aan my sy, Alles oor jou en Caravans.

Die remix van Morné se Lied en die boek bewys dat musiek en woorde saam ’n kragtige eenheid kan vorm, en dat ’n enkele lied selfs die diepste menslike ervarings kan oopmaak en inspireer.