VEREENIGING – Die privaatsekuriteitsmaatskappy Sekuriteit Sonder Grense (SSG) het Donderdag by die Arcon Park Shopping Centre twee vermeende kaartbedrieërs vasgetrek.

SSG het gereageer nadat ’n kliënt hulle ontbied het. Die verdagtes het na bewering probeer om ’n bejaarde persoon te bedrieg voordat hulle probeer vlug het.

Volgens SSG het die verdagtes beheer oor hul voertuig verloor toe hulle probeer vlug het. Hulle is op die toneel in hegtenis geneem en daar is beslag gelê op verskeie items.

In die voertuig is onder meer ’n kaartmasjien, bankkaarte, kontant en bankstrokies gevind.

Die saak is aan die polisie oorhandig vir verdere ondersoek.