*Die storie het eerste in die gedrukte weegawe van Vaalweekblad (16 Januarie) verskyn. Kry ons gedrukte koerant vir al die jongste nuus.

MEYERTON – Verskeie inwoners van Daleside en Witkop in Midvaal het Woensdagoggend (14 Januarie) aan ‘n vreedsame protesoptog voor Eskom se korporatiewe kantore in die dorp deelgeneem.

Die inwoners het hul frustrasie oor aanhoudende kragonderbrekings uitgespreek.

Die betogers, onder wie pensioenarisse en rolstoelgebruikers, het plakkate gedra wat lees: “Ons is 50 pensioenarisse sonder krag sedert 8 Januarie 2026. Ons het geen water nie weens kragonderbrekings by die boorgat.”

Schalk van der Merwe, eienaar van ’n plaas in die Daleside/Witkop-gebied, het aan Vaalweekblad gesê dat hy karavaanstaanplek aan ongeveer 56 bejaarde persone op sy plaas bied.

Hy sê: “Dis erg. Ons het twee mense op die plaas in rolstoele. Om sonder water te sit is nie ’n grap nie. Mens kan nog sonder krag klaarkom, maar sonder water kan mense nie eers hul toilette spoel nie.”

Betogers het hul frustrasie uitgespreek oor die onstabiele kragtoevoer wat huishoudelike toestelle beskadig en kos in yskaste laat vrot.

Gerrie Schoeman sê: “As die yskas gaan, is dit ’n hele maand se salaris net om dit te vervang.”

Marie Goosen voeg by: “Die vleis in die yskaste gaan net bederf.”

Catharina Moolman, wat aan asma ly en op ’n suurstofapparaat staatmaak, kan nie gebruik maak van haar mediese toestel wanneer die krag af is nie.

Tydens die protesoptrede het Van der Merwe met lede van Eskom vergader.

Volgens hom is Eskom nou bewus van die situasie. Hy het ook ’n direkte kontaknommer ontvang om toekomstige probleme vinniger op te volg.